( فلسطين )
ملاحظة : هذه القصيدة بلسان كل فلسطيني وليست بلسان الشاعر
يا أطهر أرض يا أصل الرســــــــــالات
عشكتج عشك بس والله مو كافـــــــي
يا طِيبَةْ قَبُل يا شيمة الأعــــــــــــــراب
يا نسمة هوى يا خِيرة أسلافــــــــــي
يا أول عِشك دغدغ ثنايا الــــــــــــروح
يل حبج أصل فوك القلب طافـــــــــي
يا فرحة نصر يا زينة يا جُكليـــــــــــت
يا قاموس حبي الشامل الوافــــــــــي
عِشْت سنين عمري مشتت ومطــــرود
شوكت أرجع وأغفى بحضنج الدافـي
من عندج خَذيت الوِفا والإخـــــــلاص
وبيهن كمّلت أطباعي وأعرافـــــــــي
كل شعبج وفي ما بيننا بــــــــــــــــذات
ونكص ايد الردي الما يكَدر يوافــــي
فلسطيني لأني ابن غيرة وجــــــــــــود
كل هاي البشر محتارة باوصافــــــي
ولأن من ارضي عرج أشرف النــــاس
عن هاي البشر كلهه اختلافــــــــــي
يخيروني اصير بيوم خــــــــــــــــــوّان
ويلبسوني ذهب والماس صافــــــــي
ولكن ابنج اني , ما اخون الـــــــــــزاد
لو اكضي العمر متشرد وحافـــــــــي
الله شكد يحبج يا زهرة البلـــــــــــــدان
وكلج أُخذي من خيراتي واصنافـــــي
من دمنا شكثر يا حلوة شرّبنـــــــــــاج
وكلنالج فدى صحّة وعوافـــــــــــــي
ومن أهل الغدر شفتي الحزن والضيــم
وكضّيتي العمر مفزوعة وتخافــــــي
قصّرنا بدلالج من زاحمتنا همــــــــــوم
وحكج لو زعلتي العمر وتجافـــــــي
ولكن خاطرت وحملت بيدي الــــــروح
وجتاف المنايا ملازمة اجتافــــــــــي
ومن فركاج جتني شكثر امــــــــــراض
وبس الله الوحيد الساتر الشافـــــــي
أبد مو محترف أني بشعر مــــــــوزون
وتبيّن الج كـل إحترافــــــــــــــــــــــي
لان كلبي بعشك يكتبلج أشعـــــــــــــــار
ولوحدة القلم ينهي القوافـــــــــــــــي
يلوموني البشر هلكد أغار عليــــــــــج
وهلكد يا بشر مكشوف إسرافــــــــي
يل عشكج فضحني بوسط هاي الناس
وأنا بعشكج مسجّل إعترافـــــــــــــي
وعلى كلبي رسمتج وردة القـــــــــدّاح
بس أنزع قميصي بساع تنشافـــــــي
حكهه الدول منج تجن وتغـــــــــــــــار
كل هذا الدمار وِضواج ما طافــــــــي
علي أحمد أبو خليفة
21/10/2011
المقال لا يعبر بالضرورة عن رأي الموقع
"حقوق النشر محفوظة لموقع " فلسطينيو العراق" ويسمح بإعادة النشر بشرط ذكر المصدر"